Friday, April 9, 2010

کارل مارکس : اک ادبھتّ گاتھا - سرجن زیروی


" …مارکس اک مکھ اتہاسک واپرنا سی۔ اکثر ایہہ خیال کیتا جاندا ہے جے کوئی ہور نہ ہویا ہندا تاں اسدا کارج کسے ہور نے سرے چڑھا دینا سی… پر ایہہ نہیں آکھیا جا سکدا کہ جے مارکس نہ جیویا ہندا تاں سنسار نے پھر وی انجھ ہونا سی، جویں اوہ ہن ہے۔"

ایہہ شبد حالَ ہی وچ پورے ہوئے کینیڈیئن مول دے اگھے امریکی ایکانومسٹ تے سوچوان جاہن کینتھ گالبریتھ دے ہن۔

مارکس دے مرن دیاں خبراں دین والیاں نوں اندروں ایہہ یقین نہیں کہ مارکس مر گیا ہے۔ ایہہ ٹھیک ہے کہ روسی انقلاب مارکس دے وچاراں دی جت دا پرتیک سی اتے سوویت یونین دے خاتمے نے مارکسوادیاں لئی کئی بنیادی سوال کھڑے کر دتے ہن۔ تاں وی روسی انقلاب مارکسی وچاراں دے پربھاو ہیٹھ آئیاں وشو تبدیلیاں دا اکو اک پرگٹاوا نہیں سی بھاویں ایہہ پرتیتیوگ پرگٹاوا ضرور سی۔ ایہناں تبدیلیاں دے کئی ہور وی روپ ہن۔ ایہہ روپ اینے پرتکھ روپ وچ مارکسی سوچ وچ رنگے ہوئے نہ وی ہون پر ایہناں پچھے مارکسی پریرنا دی موجودگی توں انکار نہیں ہو سکدا۔

روسی انقلاب دے سنبندھ وچ اک گلّ ضرور آکھی جا سکدی کہ ایہہ انقلاب ستّ دہاکے ٹکیا جدوں پیرس کمیون ستّ دن تے فرانسیسی انقلاب کیول ستّ گھنٹے ٹکیا سی۔

کارل مارکس بارے ڈونگھی پرسنسا پرگٹاؤندے گالبریتھ دے ایہناں شبداں دا اچیچا ملّ اس لئی ہے کہ اوہ مارکسی وچاراں دا پیروکار نہیں سی پر اپنے وشال ادھٔین دے آدھار اتے اوہ اینا ضرور جاندا سی ایکنامکس سمیت گیان دے وکھ وکھ کھیتراں وچ مارکس دی دین سچمچ کنی اتہاسک ہے۔

19ویں صدی دا مہان چنتک کارل مارکس "اک مولک تے کلپناشیل ایکانومسٹ، بے مثال سماج وگیانی تے نویں سیدھ دین والا دارشنک سی۔" اسدے نال نال، جاں انجھ کہہ لؤ کہ ایہناں اسادھارن گناں کارن، اوہ اک درڑھ انقلابی وی سی۔ کی منکھتا لئی مارکس دی دین دا ملّ گھٹ جاندا ہے کیونکہ سوویت یونین نہیں رہا تے شوشلسٹ کیمپ ختم ہو گیا ہے جاں مارکسواد دا ذکر ہن گھٹّ ہی ہندا ہے؟

بھاویں ایہہ ساریاں گلاں اپنے آپ وچ درست ہن پر پچھلی صدی نے اجیہے کئی ہور وی تکھے پریورتن لیاندے جنہاں دے کارن سنسار دا مہاندرا اکا ہی بدل چکا ہے۔ غلام دیس آزاد ہو چکے ہن، بستیواد ختم ہو چکا ہے، نسل واد، بھیدبھاو تے غلامی اتے آدھارت ووستھاواں ہن نہیں رہیاں تے امریکہ جہیاں جنہاں طاقتاں نوں سامراجی شکتی بنن دا جھلّ مڑ توں اٹھدا ہے، اوہناں نوں اپنے اس جھلّ لئی ہر وار اپمانت ہی ہونا پیا ہے۔

اتے پچھلے سمیں وچ، خاص طور 'تے دوسری سنسار جنگ توں بعد آئے، اجیہے تکھے پریورتن کسے دیوی منائی جاں اچنچیت واپرن والے گھٹنا چکر دا سٹہ نہیں سن سگوں لمے تے کٹھن سنگھرشاں دا سٹہ سن۔ اتے جے ایہناں سنگھرشاں نوں گہہ نال پڑھیا جائے تاں ایہہ سدھے جاں اسدھے طور 'تے اس اتہاسک واپرنا نال جا جڑدے ہن جسدا ڈھکواں عنوان گالبریتھ دی نظر وچ "مارکس" ہی ہو سکدا سی۔

صرف اینا ہی نہیں کہ ایہناں سنگھرشاں دے بہت سارے آگوُ مارکس دے وچاراں توں ڈونگھی طرحاں پربھاوت سن سگوں جہڑی پریرنا تے سمرتھن اجیہے سنگھرشاں نوں نویں ابھرے سوویت یونین تے اسدے موڈھی لینن توں حاصل ہوئی، اسدی اتہاسک حقیقت توں انکار نہیں ہو سکدا۔ جے بہت سارے نوَ-آزاد دیس پچھمی طاقتاں دے دباء اگے ڈٹّ سکے اتے اپنے پیراں اتے کھڑے ہو سکے تاں ایہہ وی اس حقیقت دا صدقہ سی کہ سوویت یونیئت اوہناں دی بھروسے یوگ دھر سی۔ ایہہ وی نہیں کہ جنہاں گھٹناواں نوں مارکس دی سوچ جاں درشٹی دے کھنڈن وجوں پیش کیتا جاندا ہے اوہی بھوکھ دیاں جاں اتہاس دے وہن دیاں پکیاں نشانیاں ہن۔ جے اجیہا ہندا تاں لاطینی دیساں وچ کھبے پکھی موڑ کدے نہ آیا ہندا اتے اوہ وی اس حالت وچ جدوں ایہہ دیس امریکہ جہی واحد مہانشکتی دی کرودھوان گھوری ہیٹھ رہِ رہے ہن۔ نہ ہی سوویت یونین دے خاتمے توں ایہو ثابت ہندا ہے کہ پونجیواد اک اجیہا پریپورن پربندھ ہے جس وچ کسے بنیادی پریورتن دی لوڑ نہیں۔

ایہہ وی چھوٹی گلّ نہیں کہ سنسار دے کسے مہاندیپ وچ اجیہی کوئی تھاں نہیں جتھے وپار دے ویس وچ نوبستیواد نوں مڑ توں مڑھن دیاں کوششاں نوں بنا ونگارے جاں بنا ٹاکرے لنگھن دتا جا رہا ہووے۔ ہو سکدا ہے ایہہ سارا کجھ پردرشت طور 'تے مارکسواد دے جھنڈے ہیٹھ نہ ہو رہا ہووے، پر مارکسواد کوئی منتر جاں تویت نہیں، ایہہ اک چیتنا ہے تے اس چیتنا دی جھلک ایہناں گھٹناواں توں علاوہ اوہناں وشال مظاہریاں توں وی تکی جا سکدی ہے جہڑے اٹھ وڈیاں دے سمیلناں ورودھ، سنسار بینک تے قومانتری مالی فنڈ دے ہتھکنڈیاں ورودھ، سنسار وپار جتھیبندی راہیں انوکست دیساں نوں اساویں سمجھوتیاں دے جال وچ پھاہن دے منصوبیاں ورودھ، عراق اتے حملے ورودھ جاں وڈیاں طاقتاں دیاں آپہدراشاہیاں ورودھ آپ مہارے ہو رہے ہن۔ واستو وچ ایہہ ویاپک مظاہرے اجیہی تکھی تبدیلی دی تانگھ نوں ہی دراؤندے ہن جہڑی اس ویلے دے بھارو پونجیوادی پربندھ نوں جڑھاں توں ہلائے بنا نہیں آ سکدی۔

اسے سمیں وچ جے پچھمی دیشاں وچ مزدور جماعت نے جتھیبند ہون تے سموہک سمجھوتے کرن جہے اہم ادھیکار حاصل کیتے اتے پینشناں، بے روزگاری بیمے تے سماجی سرکھیا جہیاں ووستھاواں ستھاپت کروائیاں تاں ایہہ پونجیواد دی دیا بھاونا جاں ادارتا دا سٹہ نہیں سی۔ اس دے لئی ایہناں دیشاں دی مزدور جماعت نوں لمبے تے کٹھن سنگھرش لڑنے پئے۔ اس حقیقت توں کون انکار کر سکدا ہے کہ ایہناں سنگھرشاں دی جاگ مارکسواد توں ہی لگی سی اتہاس اس گلّ دا گواہ ہے کہ آرنبھک دور وچ جہناں کارکناں تے آگوآں نے ایہہ سنگھرش اپنیاں جاناں دی بازی لا کے اسارے سن، اوہناں لئی پریرنا دا اک اِک سروت مارکس ہی سی۔ ایہہ گلّ وی سببیں نہیں سی سوویت یونین دے خاتمے توں بعد پچھمی دیشاں وچ جس ورگ نوں تکھے وار سہنے اتے اپنے حقاں توں ہتھ دھونے پے رہے ہن اوہ جتھیبند مزدور جماعت ہی ہے۔ حالانکہ ایہناں دیشاں دیاں ٹریڈ یونیناں دے آگوُ اپنے آپ نوں کمیونسٹ دشمنی دیاں سوہاں کھان توں کسے توں پچھے نہیں ہن۔�دراصل جہڑی گلّ مارکس نوں "اتہاسک واپرنا' دا درجہ دندی ہے اوہ سی اتہاسک گتی نوں سمجھن دی اسدی نیاری ودھی ۔ اس ودھی دا مڈھلا سنکلپ تاں اسنے جرمن فلاسفر ہیگل توں لیا سی پر اسنوں اک ویاپک وچاردھارا وجوں سرئنجام دین دا کم نرول اسدا اپنا سی۔ ایہہ ودھی سنسار دے قدرتی، اتہاسک تے وچاردھارک پکھاں نوں اک اجیہی گندویں پریکریا وجوں دیکھدی ہے، جسدا مڈھلا نیم ہے نرنتر پریورتن تے وکاس۔

مارکس توں پہلاں جے اتہاسکار اتہاس نوں بیان کردے سن تاں بادشاہاں، سورمیاں تے یودھیاں دے کارنامیاں دی کہانی وجوں پیش کردے سن، جے سماج وگیانی سماج نوں چتردے سن تاں دھرم تے سداچار دے چوکھٹے وچ ہی چتردے سن، جے آرتھک ماہر ارتھ چارے نوں سمجھانؤندے سن تاں پرچلت آرتھک تانے بانے دے پرسنگ وچ ہی سمجھاؤندے سن، اتے جے فلاسفر سنسار دی ویاکھیا کردے سن تاں بہتی وار اوہ دھرتی توں اینے اتانہ اٹھ جاندے سن کہ اپنیاں ہی خیال اڈاریاں وچ گواچکے رہِ جاندے سن۔

مارکس پہلاں سوچوان سی جسنے ایہناں ساریاں سوچ پرنالیاں نوں اکو سوتر وچ پرو کے اتہاس، سماج تے ارتھ چارے دی اک اجیہی جیوندی جاگدی تصویر پیش کیتی جس وچ پچھیتر تے اگیتر دسحدیاں توں پراں تکّ تکے جا سکدے ہن تے جس وچ منکھی سماج دے وکاس نوں اگے لے جان والیاں شکتیاں پچھانیاں جا سکدیاں سن۔ مارکس نے اتہاسک پدارتھواد تے دنودتامک پدارتھواد دے روپ وو جہڑی مولک وچاردھارا وکست کیتی اسدا اک نویکلا پکھ ایہہ ہے کہ کارج شیلتا اسدا اک بنیادی انگ ہے تے اس کارج شیلتا دا رن کھیتر ہے سانجھیوالتا۔ مارکس نوجوان ہی سی جدوں اسنے کیہا سی کہ "فلاسفراں نے سنسار دی کسے اس جاں اس ڈھنگ نال ویاکھیا ہی کیتی ہے، جدوں لوڑ اسنوں بدلن دی ہے۔"

اپنے اس کتھن دی پالنا مارکس نے جنی کرڑائی نال آپ کیتی، اوہ اسدی زندگی دی اک ادبھتّ گاتھا ہے۔ بھاویں ایہہ گاتھا مکمل تاں ہی ہندی ہے جے اسدے جیون بھر دے ساتھی تے اسدے برابر دے وچاروان پھریڈرک اینگلز دا ذکر وی نالو نال ہووے، پر اس گاتھا دے وستھار نرسندیہ مارکس دے اپنے ہن۔

ایہہ مارکس ہی سی جسنے اپنے انقلابی کرتوّ نبھاؤندیاں تے اسدے لئی اکا ہی نویں وچارتھارا نوں ترتیب دندیاں اپنے ویلے دے راجاں تے راجنیتک پربندھاں اتے شرینی ہتاں اتے آدھارت ستھاپتیاں تے سنستھاواں نوں ونگاریا، قنوناں، وشواساں، ریتاں، مانتاواں تے متھیاواں نوں اپنے نشتر ہیٹھ لیاندا۔ اسدے لئی جہڑا بہت وڈا ملّ اسنوں تارنا پینا سی، اسنے اتے اسدے پریوار نے تاریا۔ اس ملّ دے حصے وجوں اوہناں نوں دیس دیسانتراں وچ رلنا پیا تے سالامبدھی آتر کر دین والیاں تنگیاں بھوگنیاں پئیاں۔

جے مارکس لئی ایہہ لکھیا گیا تاں ٹھیک ہی لکھیا گیا کہ اسدے لئی اتہاس ادھٔین دے وشے نالوں اک اجیہی حقیقت ودھیرے سی، جسنوں جیونا تے سانجھا کرنا اسدے لئی آوشک سی۔ پر مارکس نوں ایہہ گمان ہرگز نہیں سی کہ دنیا نوں بادلن لئی اسدے ویکتی گت یتن کافی ہن۔ اسدی اصل دین اس گلّ وچ وی سی کہ اسنے سماجی وکاس تے پریورتن پچھے کم کردی چالک شکتی نوں پچھانیا۔ اسنے دیکھیا کہ ایہہ چالک شکتی، کسے وی سماج وچ، وکھ وکھ وستاں دی پیداوار تے ونڈ اتے آدھارت سماجی شرینیاں وچالے ٹکراء دے روپ وچ ساہمنے آؤندی ہے۔

مارکس نے لکھیا سی، "موجودہ سماج دا ہن تکّ دا اتہاس شرینی سنگھرشاں دا اتہاس ہے۔ آزاد وسنیک تے غلام، کلین تے کمی، جاگیردار تے مظارے، گلڈماسٹر تے جرنیمین، دوسرے شبداں وچ جابر تے مزدور اک دوسرے دے ٹاکرے وچ نرنتر ڈٹے ہوئے اتے کدے لکویں تے کدے کھلھے نروگھن سنگھرش وچ الجھے ہوئے ملدے ہن، اس لڑائی دا سٹہ ہر وار پورے دے پورے سماج دے کرانتی کاری پنرنرمان وچ جاں دوہاں ورودھی شرینیاں دی آپسی تباہی وچ نکلدا رہا ہے۔

مارکس دا متّ سی کہ کسے وی دور دے سماج نوں سمجھن دی کنجی اس سمیں دے ارتھ چارے وچ ہندی ہے۔

جے کسے سماج وچلا مکھ تضاد ہی دوند، گتی تے پریورتن دا کارن بندا تاں پونجیوادی سماج وچ وی اجیہا تضاد موجود ہے۔ اس سماج دا بنیادی تضاد ایہہ ہے کہ اتپادن دیاں جہڑیاں نویاں پیداواری شکتیاں مشینری دی شکل وچ منکھتا نے پیدا کر لئیاں ہن اوہ پیداوار دے خاصے نوں ودھدے روپ وچ سماجی تے سہکاری بنا رہیاں ہن کیونکہ اس دے لئی وڈی گنتی وچ کامیاں نوں کارخانیاں تے فیکٹریاں وچ اکٹھیاں ملکے کم کرنا پیندا ہے جد کہ پیداواری سادھناں دی مالکی نجی ہے۔ پیداوار دے سموہک جاں سماجی خاصے تے اس دے نجی اپیوگ دے اس تضاد دی نمائندگی جہڑیاں دو مکھ شرینیاں کردیاں ہن اوہ ہن مزدور تے سرمائیدار ۔ ایہناں دوہاں شرینیاں وچالے ٹکراء اجیہے متّ-ورودھاں دے روپ وچ ساہمنے آؤندا ہے، جہڑے کدے اکسر نہیں ہو سکدے۔

اس تضاد دے ہندیاں مارکس نے ایہی نتیجہ کڈھیا سی کہ پونجیواد وچ پرورتن لیاؤن دا انقلابی کرتوّ سچیت مزدور شرینی نبھائیگی کیونکہ ایہہ مزدوراں دی محنت ہی ہے جہڑی اس سماج دے مکھ لکش، منافعے، دا سروت ہے۔ اسنے ایہہ گلّ قطعی طور 'تے ثابت کیتی کہ کسے مزدور نوں اسدی اٹھ گھنٹے دی کم-دہاڑی لئی جنی اجرت دتی جاندی ہے، اسدے برابر دی قدر اوہ پنج جاں چھ گھنٹیاں دی محنت نال پوری کر دندا ہے، باقی دو جاں تنّ گھنٹیاں دی وادھو محنت نال اوہ جہڑی قدر پیدا کردا اوہ منافعے دی شکل وچ پیداواری سادھناں دے مالک ارتھات پونجیپتی دے پیٹے پے جاندی ہے۔ مارکس نے محنت-فلہنت دی اس ونڈ نوں سماجی طور 'تے لوڑیندی قدر تے وافر قدر دا ناں دتا سی۔

جے پونجیواد وچ کسے تبدیلی دا اصل منتوَ ایہہ سی کہ محنت نوں نجی منافعے دی پورتی دی تھاں سمچے سماج دی انتی دا حصہ بنایا جائے تاں ظاہر ہے اجیہے منتوَ دی پراپتی لئی گنا اسے شرینی اتے پینا سی جہڑی اس نال سبھّ توں ڈونگھی طرحاں سمبندھت سی۔ تاں وی مارکس ایہہ تاں سمجھدا سی کہ سرمائیداری پربندھ وچ تبدیلی لیاؤن دا کارج مکھ طور 'تے مزدور جماعت سرے چڑھائیگی پر اسدا ارتھ ایہہ نہیں سی کہ اوہ سوچواناں نوں اس کارج نالو اسبندھت جاں لاواستا خیال کردا سی۔ اس دے الٹ اسدا یقین سی کہ جے فلسپھیانا رچی والے سوچوان اپنے لئی برابر دی سرگرمی لبھّ سکدے ہن تاں کیول سوشلزم لئی سنگھرش وچوں ہی لبھّ سکدے ہن۔

مارکس سمجھدا سی سماج واد لئی سنگھرش کسے اک شرینی دی نجات لئی نہیں سگوں سمچی منکھتا دی نجات لئی سنگھرش ہے۔ اس لئی ہر سوچوان نہ صرف اس سنگھرش دا حصہ ہو سکدا ہے، سگوں اوہ اسدا حصہ ہو کے ہی اوہ اپنی سوچ نوں ساکار ہویا دیکھ سکدا ہے۔

کی پونجیوادی سماج دی کوئی اجیہی نپن شکل وی ہو سکدی ہے جس وچ محنت دی لٹّ نہ رہے؟ اسدے لئی اسنے سرمائیداری دا اک اجیہا آدرشک ماڈل چتویا سی جس وچ نہ اجاریداریاں ہون، نہ یونیناں تے نہ ہی کسے ورگ جاں ویکتی نوں کوئی وشیش رعایت حاصل ہووے۔ اس ماڈل دے اندر ہر طرحاں دیاں گنتیاں منتیاں کرن پچھوں مارکس نے ایہہ نتیجہ کڈھیا سی کہ پونجیوادی ووستھا دی کسے وی شکل وچ منافعے دا سروت محنت ہی رہندی ہے۔

سرمائیداری پربندھ ہیٹھ وستاں دی پیداوار دے سماجی خاصے تے اس اتے نجی قبضے وچلے تضاد وچوں کئی ہور وکار پیدا ہندے ہن، جنہاں ولّ مارکس نے اچیچا دھیان دوایا سی۔ اجیہے وکاراں وچ شامل ہے مندواڑیاں تے سنکٹاں دا چکر جہڑا اس پربندھ نوں تھوڑھے تھوڑھے وقفے پچھوں آ گھیردا ہے۔ بھاویں اس پربندھ نے سنکٹ جاں مندواڑے دی تیبرتا نوں گھٹاؤن دے کجھ گر لبھّ لئے ہن پر اوہ مندواڑیاں دے تیئیئے تاپ توں اکا ہی مکت نہیں ہو سکیا۔ اتے ایہہ مندواڑے جدوں آؤندے ہن، بھاویں اوہ سرسری نوئیئت دے ہی کیوں نہ ہون، کماں تے کاروباراں نوں بری طرحاں لتاڑ جاندے ہن، انگنت بزنس دیوالیہ ہو جاندے ہن، عمر بھر دیاں کمائیاں ڈبّ جاندیاں ہن تے فیکٹریاں نوں جندرے لگّ جاندے ہن۔ پر ایہناں مندواڑیاں دا سبھّ توں تباہکن اثر اوہناں لوکاں اتے پیندا ہے، جناں لئی محنت توں علاوہ گزارے دا ہور کوئی وسیلہ نہیں ہندا۔ منکھی ارتھاں وچ ایہہ مندواڑے بہت مہنگا ملّ وصول کردے ہن۔ انگنت پروارک زندگیاں نشٹ ہو جاندیاں ہن، بے کاری، مانسک الار، نراستا تے کمینگی دی بھاونا سمچے سماج نوں آ دبوچدی ہے اتے جدوں تکّ حالت سمبھالدی ہے، سماج دا اک پور دا پور ایہناں مندواڑیاں دی نظر ہو چکا ہندا ہے۔

منافیاں تے دھن دی بے لغام حرص اس پربندھ دا اک ہور انمنکھی پکھ ہے۔ حرص دی اس کھیڈ وچ کسے پھراڈ، کسے ہیراپھیری، کسے دھوکھیبازی نوں انؤچت نہیں سمجھیا جاندا اتے کسے سبھی نیم جاں ضمیر ناں دی کسے چیز نوں اس دے راہ وچ کھڑے نہیں ہور دتا جاندا۔

اجیہی بے لغام حرص دا اک درش پچھم دے لوک کجھ سماں پہلاں دیکھ چکے ہن جدوں اینرون تے ورڈکام جہیاں وشو کاروریشناں دے محل دیکھدیاں ہی دیکھدیاں ڈھیری ہو گئے تے انگنت سادھارن شعر ہولڈراں تے ایہناں کارپوریشناں دے ہزاراں ملازماں دی شعراں دے روپ وچ لگی عرباں ڈالر پونجی ایہناں کارپوریشناں دے ملبے ہیٹھ ملبہ ہو گئی۔ پر ایہناں کارپوریشناں دے غرقن توں این پہلاں اس دے ایگزیکوٹ ڈائریکٹراں نے آپو اپنیاں سٹاک آپشنز پوری قیمت اتے ویچکے کروڑاں ڈالر کھرے کر لئے سن۔ ایہہ پھراڈ توں اتے اک ہور مہانپھراڈ سی۔

مہانپھراڈ دے اس ناٹک نے پہلی وار کارپوریٹ سنسار دی اندرلی تصویر نوں ساہمنے لیاندا-اہاندا اندرلی تصویر اونی ہی گھناؤنی سی جنی ایہناں دی باہرلی تصویر رنگین تے خوش نما نظر آؤندی سی۔ آزاد منڈی دے اپاشک ایہہ دیکھکے دنگ رہِ گئے کہ کارپوریشناں دے ہوامہل جائلی حساب کھاتیاں راہیں پیدا کیتا ہویا اک جھاؤلا ہی ہن۔ کارپوریٹ سکینڈلاں دے سنبندھ وچ جنہاں دوشیاں ورودھ مقدمے چلے جاں چل رہے ہن، اوہناں نوں دیکھکے حیرانی ہندی ہے کہ ایہہ سسٹم کس قسم دے کوجھے کردار پیدا کر رہا ہے۔ اپنے اجلے ودھیا پہراویاں وچ اوہ کنے ساؤُ تے سبھی نظر آؤندے ہن پر اندروں کنے کھوکھلے تے نیچ ہن۔

مارکس دا پکا یقین سی کہ گمبھیر ورودھتائیاں دی شکار پونجیوادی سماج نے ختم ہو کے رہنا ہے تے اسدی تھاں منکھتا اک اجیہا شرینی رہت سماج سرجیگی جس دا بنیادی نیم ہووےگا "ہر اک توں اسدی سمرتھا انوسار تے ہر اک نوں اسدی لوڑ انوسار۔"

سماج واد نوں اوہ شرینی رہت سماج دا پہلا پڑائ خیال کردا سی۔ بھاویں زندگی نے اسنوں عینی محلت نہ دتی کہ اوہ اپنے تصور دے شرینی رہت سماج دی وسترت روپ ریکھا الیک سکدا۔

٭ ٭ ٭

مارکس دا جنم مئی 1818 نوں جرمنی دے قصبہ ٹریئر وچ ہویا۔ اسدے پتا اپنے ویلے دے منے پرمنے وکیل سن۔ اوہ چاہندے سن کہ اوہناں دا پتر وی وکیل بنے۔ پر بون پچھوں برلن یونیورسٹی وچ پڑھدیاں مارکس اپنے ویلے دے دارشنک سنواداں وچ اجیہا کھبھیا کہ فلسفے دا ہی ہو کے رہِ گیا۔

مارکس دے جیون بھر دے ساتھی، دوست تے ہمدم سن پھریڈرک اینگلز جسنے ہر قدم اتے مارکس دا ساتھ نبھایا۔ ایہہ ساتھ اسنے نہ صرف وچاراں دے پکھوں سگوں جہنیں دنیں مارکس نوں سخت تنگدستی دی حالت وچوں لنگھنا پیا، اسنوں مالی سہائتا پہنچاؤن دے پکھوں وی تے مارکس دی موت پچھوں اسدیاں انچھپیاں لکھتاں دا سمپادن کرن تے اوہناں نوں پرکاشت کرواؤن دے پکھوں وی۔

ایہناں دوہاں مہان چنتکاں وچالے سہیوگ 1844 وچ پیرس توں شروع ہویا جتھے اوہ دوسری وار ملے سن۔ پیرس وچ مارکس دا اس سمیں دا سنکھیپ پڑھا اسدی گھالنا بھری زندگی دا مڈھ سی۔ جرمن ادھیکاریاں نے اسنوں دیس بدر کر دتا سی کیونکہ اوہناں لئی اسدے اوہ سمپادکی برداشت کرن اوکھے ہو گئے سن جہڑے مارکس اپنے سمپادن ہیٹھ چھپدے پرچے وچ لکھدا سی۔ پیرس وچ اسنے اک ہور پرچے دا سمپادن سمبھالیا پر جرمن ادھیکاریاں دے دباء ہیٹھ فرانس دی حکومت نے اسنوں اتھوں وی 24 گھنٹے دے اندر اندر کوچ کر جان دا حکم دے دتا۔ مارکس تے اسدے پریوار نوں اپنا ڈیرہ برسلز (بیلجیئم) وچ لاؤنا پیا۔ بیلجیئم وچ اسنے جنے کو سال گزارے اوہ اسدی زندگی دے کجھ پرامن تے خوشی بھرے سال سن۔ اتھے ہی اسنے اینگلز نال ملکے اتہاس سرجک دستاویز "کمیونسٹ مینیپھیسٹو" لکھیا اتے اتھے ہی اس مینیپھیسٹو دے آدھار اتے کمیونسٹ لیگ قایم کیتی۔

کمیونسٹ مینیپھیسٹو دے آرنبھک بول سن، "اک پرچھائی نے یورپ دی نیند حرام کر رکھی ہے۔ ایہہ پرچھائی کمیونزم دی ہے۔ پرانے یورپ دیاں ساریاں طاقتاں -پوپ تے زار، میٹرنچ تے گازو، فرانسیسی ریڈیکل تے جرمن جاسوس -اس پرچھائی نوں ٹالن لئی پوتر گٹھجوڑ کیتی بیٹھیاں ہن۔"

ایہہ مینیپھیسٹو ایہناں ونگار بھرے بولاں نال سماپت ہندا سی، "جے حاکم شرینیاں کمیونسٹ انقلاب دی گونج توں کمبدیاں ہن تاں اوہناں نوں تاں کمبن دیو، مزدوراں کول گواؤن لئی اپنیاں زنجیراں توں علاوہ ہور کجھ نہیں۔ اوہناں دے جتن لئی ساری دنیا پئی ہے۔ دنیا بھر دے مزدورو اک ہو جاؤ۔"

1848 دا سال سارے یورپ وچ اک طرحاں دے انقلابی ابھار دا سال سی۔ اسے سال فروری وچ فرانس وچ اوہ غدر ہویا جس وچ مزدوراں توں علاوہ بزنس مین تے چھوٹے ادمی وی شامل سن تے جسنوں فرانسیسی انقلاب دے ناں نال جانیا جاندا ہے۔ ایہہ انقلاب کم دے ادھیکار دے نعرے نال شروع ہویا سی۔ کم دے ادھیکار دا نعرہ ادوں سچمچ انقلابی نعرہ سی۔

اجیہے ہی انقلابی ابھار اس سال جرمنی تے بیلجیئم سمیت کئی ہور یورپی دیساں نے وی دیکھے۔

1848 دے واقعیات توں بیلجیئم دے ادھیکاریاں نوں وی گھبراہٹ ہونی سی تے ایہہ وی آوشک سی اس گھبراہٹ دی سزا مارکس نوں بھگتنی پیندی کیونکہ ادوں تکّ اسدا ناں پولیس دیاں سوچیاں دے سکھر اتے پجّ چکا سی۔ سٹے وجوں بیلجیئم حکومت نے وی مارکس توں کھہڑا چھڈاؤنا وچ ہی بھلا سمجھیا۔

مارکس دے اگلے ٹکانے لئی یورپ وچ اک ہی دیس رہِ گیا سی تے اوہ سی انگلینڈ۔ اسنے 24 اگست 1849 نوں اس دیش دے تٹّ اتے قدم رکھیا اتے اگلے 34 سال اسنے اس دیس وچ ہی بتائے۔ جدوں اوہ انگلینڈ پجیا تاں اوہ صرف 31 سال دا سی پر اس جوان عمر وچ ہی اوہ جنے سنگھنے واقعیات وچوں لنگھ چکا سی تے جنا ویاپک انوبھوَ حاصل کر چکا سی، اسنے اسنوں اجیہا ہلونیا کہ اسنوں عمر بھر چین نال نہ بیٹھن دتا۔ جدوں اوہ انقلابی محاذ اتے نہیں سی جوجھ رہا ہندا، اوہ اتہاس تے فلسفے دا منتھن کر رہا ہندا سی۔

کمیونسٹ مینیپھیسٹو وچ نویں سماج دا جہو جیہا نقشہ اسنے تے اینگلج نے الیکیا سی اسدے لئی شکتی شالی انقلابی لہر اسارن دے منتوَ نال اسنے پہلی انٹرنیشنل جتھیبند کیتی۔ مزدور جماعت دی اس پہلی وشو جتھیبندی لئی جہڑی کانفرنس 28 ستمبر 1864 نوں لندن وچ ہوئی اس وچ یورپ بھر توں 2000 مزدور نمائندے، ٹریڈ یونین آگوُ تے دانشور شامل ہوئے سن۔پیرس انقلاب توں بعد محنت کش شرینی ولوں طاقت اتے قابض ہون دا جہڑا اک ہور ہمبھلا مارکس نے تکیا اوہ سی 1871 دا پیرس کمیون، پر ایہہ ہمبھلا وی ادھورا ہی رہا۔ تاں وی پیرس کمیون بارے انکت اسدی لکھت "فرانس دی کھاناجنگی" اس دیاں اجہیاں ہور اتہاسک لکھتاں وچ شمار ہندی ہے، جناں توں اتہاس تے سماج دی گتی دی تھاہ ملدی ہے۔

اپنی اس لکھت وچ مارکس نے پیرس کمیون دے پچھوکڑ تے اسدی اسفلتا دے کارناں دے جہڑے وستھار دتے تے جہڑا وشلیشن پیش کیتا استوں اسدی بودھک گہرائی، اسدی تکھی نیجھ تے دوردرشتا دا پتہ لگدا ہے۔ محنت کش شرینی نال سمبندھت 'پیرس کمیون' دی مکھ اتہاسک گھٹنا نے اسنوں کنا ہلونیا، اوہ "فرانس دی کھاناجنگی" وچ درج ایہناں سطراں توں ظاہر ہے:

"محنت کش لوکاں دے پیرس نوں اوہناں دے کمیون نوں، اک اجیہے شانامتے لگن وجوں ہمیشہ ہمیسا لئی اک جشن دے روپ وچ منایا جاندا رہے گا، جہڑا نویں سماج دا سندیش لے کے آیا۔ اسدے شہید محنت کش سرینی دے دھڑکدے دلاں وچ پوتر یاد بن کے امر ہو گئے ہن۔ اسدے قاتلاں نوں اتہاس نے اجیہی سدیوی چرکھڑی اتے ٹنگ دتا ہے، جتھوں ایہناں دے پادریاں دیاں ساریاں ارداساں وی ایہناں نوں چھٹکارا نہیں دعا سکنگیاں۔"

اک کرانتی کاری وجوں مارکس نے جو کجھ کر دکھایا، اس جہی ہور مثال اتہاس وچ گھٹّ ہی ملدی ہے۔ ایہہ اسے دی انتھک ہمت دا نتیجہ سی کہ اک قومانتری مزدور لہر ہوند وچ آئی۔ بھاویں اپنے آپ وچ ایہہ اک بڑی وڈی پراپتی سی پر جس دین نے اسنوں اتہاس وچ سدیوی مقام بخشیا اوہ سی ایکانومسٹ، فلاسرپھر تے سماج وگیانی وجوں اسدی رچنا "پونجی"۔ اسنوں پورا کرن وچ اسنے پورے 18 سال لائے پر اجے وی ایہہ رچنا نامکمل کھرڑے توں ودھ نہیں سی۔ اسدی پہلی جلد دو سالاں دے سمپادن توں بعد تیار ہوئی۔ جدوں 1883 وچ مارکس دا دہانت ہویا تاں اسدیاں تنّ جلداں اجے مکمل ہونیاں رہندیاں سن۔ باقی دو جلداں دے سمپادن دی اتہاسک ذمہ واری پھریڈرک اینگلز نے نبھائی۔ پونجی دی دوسری جلد اینگلز نے 1885 وچ تے تیسری جلد 1894 وچ پرکشت کروائی۔ چوتھی تے انتلی جلد بہت چر پچھوں 1910 وچ ساہمنے آئی۔

ایہہ رچنا پوری کرن لئی منکھی گیان دا کہڑا کھیتر ہے جسنوں مارکس نے نہیں گاہیا۔۔ اسنے دنیا بھر دے ارتھ-وگیانیا دا ادھٔین کیتا، اتہاس نوں رڑکیا، فلاسفی نوں گھوکھیا، ساہت نوں پڑھیا تے جانیا تے اتھوں تکّ کہ دھرم گرنتھاں نوں وی پھرولیا۔ اسدی رچنا اجیہا پہلا سماجی وشلیشن ہے "جس وچ آرتھکتا نوں اکا ہی نوی روشنی وچ پیش کیتا گیا۔"

جنہاں ودواناں نے "پونجی" نوں نرول اس آدھار اتے پرکھیا کہ ایہہ گیان دے کنڈے اتے کویں تلدی ہے، اوہ مندے ہن سرمائیداری نظام دے پرسنگ وچ ایہہ سماج دا اجیہا ڈونگھا تے کھبھواں نریکھن ہے، جسدی کوئی ہور مثال منکھی اتہاس وچ نہیں ملدی۔ اوہناں دے کتھن انوسار ایہہ نریکھن مارکس نے کسے اخلاقی جاں انجھ کہہ لؤ کہ "چنگے ماڑے" دے پینتڑے توں نہیں کیتا تے نہ ہی منافعے دی ہوس ورگے سرمائیداری دے انمنکھی لچھناں نوں لے کے "کنی ماڑی گلّ ہے" ورگیاں روائتی جہیاں ٹپنیاں کیتیاں۔ اپنے سارے ولولے دے باو جود مارکس نے سرمائیداری نظام دا جہڑا وشلیشن کیتا اس وچ گنت ودیا جہی شدھتا ہے، پر اسدے نال نال "پونجی" وچ اجیہی دارشنک گہرائی وی ہے جہڑی منکھی درشٹی لئی نویں آیام کھولھدی ہے۔ ایہی کارن ہے کہ "پونجی" منکھتا نوں مارکس دی اک لامسال دین گنی جاندی ہے۔"

مارکس دے آلوچک وی ایہہ مندے ہن کہ "پونجی" وچ جتھے مارکس ایکانومسٹ ہے، اسدی لکھت وچ کمال دا سنکوچ ہے پر جتھے اوہ اتہاسکار تے دارشنک ہے اسدی قلم وچ لوہڑے دا ویگ تے روانی ہے۔

٭ ٭ ٭

مارکس دا ساتھی اینگلز وی جرمنی دا جمپل سی پر اوہ ودھیرے خوش حال پریوار نال سنبندھ رکھدا سی۔ اسدے پریوار دا ٹیکسٹائیل دا کاروبار سی۔ اینگلز نے وی اپنی زندگی دا بہتا حصہ انگلینڈ دے شہر مانچیسٹر وچ ہی بتایا جتھے اوہ اپنے پریوار دی فرم دی دیکھبھال کردا سی۔

جوانی دے دناں وچ اینگلز جدوں دوسری وار مارکس نوں پیرس وچ ملیا سی، اسدا ایہہ متّ بن چکا سی کہ منکھتا دی نجات اجیہا سماجی پربندھ ستھاپت کرن وچ ہے جہڑا سمپتی دی نجی مالکی توں رہت تے سانجھیوالتا اتے آدھارت ہووے۔ اجیہا سماج اسدی نظر وچ کمیونزم ہی ہو سکدا سی۔

وچاراں تے کارج دی سانجھ کارن مارکس تے اینگلز دے ناں آپس وچ اینے پرتے ہوئے ہن کہ اوہناں دوہاں دا ناں اک دوسرے نال جوڑ کے ہی لیا جاندا ہے۔ اوہ عمر بھر ملکے چلے۔ تاں وی اوہناں دیاں شخصیتاں بہت وکھریاں سن۔ اینگلز اچا لما تے سجیلہ ویکتی سی۔ اوہ خوش رہن تے زندگی نوں مانن وچ یقین رکھدا سی۔ اک سرکڈھّ چنتک وجوں اوہ تیکھن بدھی، چست سوچ تے ویاپک درشٹی دا مالک سی تے کئی زباناں جاندا سی۔ جدوں اوہ لکھن بیٹھدا سی تاں اپنی لکھت نوں مکا کے ہی ساہ لیندا سی۔

تاں وی اسنے مارکس دا ستھان اپنے نالوں ہمیشہ ہی اچا سمجھیا۔

مارکس اک اجیہا انتھکّ چنتک سی جسدا سریر گٹھیا ہویا تے جسا نروآ سی۔ اس وچ کسے جرمن سکالر والے سارے وصف موجود سن۔ اوہ بے حدّ گمبھیرچتّ، باریکبین تے خبط دی حد تکّ پورنتاوادی سی۔ اوہ اک اک تتھّ نوں انتلی حد تکّ گھوکھدا پرکھدا تے اک اک گھٹنا دی پنچھان کرن لئی کسے تردد توں سنکوچ نہیں سی کردا۔

لندن وچ رہندیاں مارکس نوں اپنے پروار دے گزارے لئی کوئی پکا کم تاں نہ لبھا پر اپنے وچاراں دی پورتی لئی اسنوں منکھی اتہاس اتے علم دا اک بھربھور سوما ضرور لبھّ پیا۔ ایہہ سوما سی بریٹیش میوزیم۔ اتھے اوہ ہر روز نیم نال گھروں 10 وجے جاندا تے شام نوں ستّ وجے پرتدا۔ انجھ سارا سارا دن اوہ کھوج دے کم وچ رجھا رہندا۔ لندن وچ اسدی عمر دا بہتا حصہ بریٹیش میوزیئم وچ ہی لنگھیا۔

گزارے دا کوئی وسیلہ نہ ہون کارن مارکس تے اسدے پروار نوں کجھ ودھیرے ہی اوکھے دناں وچوں لنگھنا پیا۔ کجھ سماں تاں اسنے اپنا گزارا نیویارک ٹربیون لئی لیکھ لکھکے توریا پر جدوں ایہہ لیکھ چھپنے بند ہو گئے، اسنے ریلوے وچ کلرکی دی نوکری لینی چاہی پر اپنی لکھائی کارن اتھوں وی اسدی عرضی ردّ ہو گئی۔ حالت ایہہ ہو گئی کہ گھر وچ جو وی چیز وکن یوگ سی اوہ ویچی گئی۔ پریوار ولوں ملے چاندی دے برتن تے گہنے پہلاں ہی وک چکے سن۔ کئی وار بے بسی اتھوں تکّ پجّ جاندی سی اسنوں گھروں باہر جانا اسمبھو ہو جاندا کیونکہ اسدا کوٹ تے بوٹ گہنے پئے ہندے سن۔ کئی موقعیاں اتے اس کول اتنے پیسے وی نہیں سن ہندے کہ اوہ اپنی لکھت اپنے کسے پرکاشک نوں بھیجن لئی ٹکٹاں خرید سکے۔ اسے سمیں وچ اسنوں کئی ہور بیماریاں دے نال نال پھوڑے وی ہو گئے سن۔ پر اسنوں اپنے دکھ اتے ہسن دی جاچ کدے نہ بھلی۔ اک وار پھوڑیاں دی پیڑھ سہندیاں دن بھر قلم چلاؤن پچھوں اوہ بریٹیش میوزیئم توں گھر پرتیا تاں اسنے کیہا، "مینوں یقین ہے، میرے پھوڑے بریازی نوں مردے دم تکّ ستاؤندے رہنگے۔"

تاں وی جدوں اوہ دیکھدا کہ اسدی تنگدستی کارن اسدے پروار دے جیاں نوں کنا دکھی ہونا پے رہا ہے تاں اوہ سچمچ پریشان ہو اٹھدا، اک وار اسنے اینگلز نوں لکھیا، "میری جان، میری جینی بیمار ہے۔ لینچین (نوکرانی) نوں اک طرحاں دا دماغی بخار ہے۔ میرے کول کوئی پیسہ نہیں کہ میں ڈاکٹر نوں بلا سکاں۔ پچھلے اٹھاں دساں دناں توں اسیں آلو تے بریڈ کھا کے گزارا کر رہے ہاں۔ لگدا نہیں اگوں ایہہ وی مل سکن۔ میں ایہنیں دنی کجھ نہیں لکھیا کیونکہ میری جیب وچ دھیلا وی نہیں کہ میں لکھن لئی باہر جا کے اخبار پڑھ سکاں…"

پر ایہہ ساریاں مشکلاں تے تھڑہاں مارکس نے کویں نہ کویں سہار ہی لئیاں۔ پر اپنی پتنی جینی دی موت دا دکھ استوں نہ سہاریا گیا۔ جدوں 1881 وچ جینی دی موت ہوئی تاں مارکس اینا بیمار سی کہ اوہ اسدی ارتھی نال وی نہ جا سکیا۔ اینگلز اس کول افسوس کرن آیا تاں مارکس نے کیہا، "مور وی مر گیا ہے۔"

(مارکس دے بچے اسنوں کجھ لاڈ نال تے کجھ چھیڑ نال "مور" ارتھات "حبشی" آکھدے سن، کیونکہ مارکس دا رنگ کجھ گہرا سی)

جے مارکس نوں لگا جویں جینی دے مرن نال اوہ وی مر گیا ہے، تاں اسنوں ٹھیک ہی لگا۔ ایہہ جینی دا صدق بھریا تے دردمندا ساتھ ہی سی جسنے مارکس نوں زندگی دے کٹھور پڑاواں وچوں لنگھن وچ مدد کیتی۔

مارکس تے جینی دی شادی 1843 وچ ہوئی۔ اوہ دوہویں اکو شہر دے سن۔ واستو وچ ایہناں دوہاں دے پروار آپس وچ گوانڈھی سن۔ ایہناں دوہاں دی بچپن دی دوستی نے انت نوں جیون ساتھ دی شکل اختیار کر لئی۔

جینی دے پتا بیرن وون ویسٹپھالن ارسٹوکریٹ تے پروی کونسلر سن۔ پر اجیہا ہندیاں ہویا وی روشن خیال تے مانوی وچاراں دے انوائی سن۔

جینی اپنے شہر دی کنی سنکھی کڑی سی، اسدا ذکر مارکس نے اپنی اک چٹھی وچ اپنے ہی انداز نال کیتا۔

ویاہ توں چوکھے سالاں پچھوں اسنے اپنے شہر دی پھیری پچھوں اپنے اک دوست نوں لکھی چٹھی وچ کیہا کہ مینوں اپنے شہر وچ اجے وی اس گلوں یاد کیتا جاندا ہے کہ میں اتھوں دی سبھّ تے سوہنی کڑی ویاہی سی۔ مینوں اس گلّ نے کنا ہلارا دتا، اسدا اندازہ توں سہجے ہی لا سکدیں۔

جینی زندگی دیاں اوکھیاں گھاٹیاں وچوں لنگھی تاں ایہہ بھلا کے لنگھی کہ اوہ کنے وڈے گھر دی دھی سی جاں اسنوں اتھے کنیاں سکھ سہولتاں پراپت سن۔ اتے اجہیاں کہڑیاں اوکڑاں سن جنہاں دا ٹاکرا اسنے اپنے پرتبھاشالی فقیر پتی نال مل کے نہیں سی کیتا۔ جدوں اک وار اسدے اک بچے دی موت ہوئی تاں اسدے کپھن لئی اسنوں اپنی کسے گوانڈھن توں پیسے منگنے پئے سن۔

مارکس تے جینی دا ساتھ اک دوسرے لئی ڈونگھے سمرپن اتے ادھارت سی۔ اسدا ذکر اک تھاں اوہناں دی بیٹی نے وی کیتا ہے۔ ایہہ اس پل دی وارتا ہے جدوں جینی موت دیاں گھڑیاں گن رہی سی تے مارکس سخت بیمار سی۔ اوہناں دی بیٹی لکھدی ہے:

"ساڈی پیاری امیں اگلے وڈے کمرے وچ پئی سی تے مور نال لگدے چھوٹے کمرے وچ لیٹیا ہویا سی۔ مینوں اوہ سویر نہیں بھلدی جدوں مور وچ عینی کو ہمت آئی کہ اوہ اٹھ کے میری ماں دے کمرے وچ جا سکے۔ جدوں اوہ اک دوسرے دے کول سن تاں اوہ مڑ توں جوان ہو گئے جاپدے سن۔ اوہ اک نڈھی مٹیار تے اوہ قربان ہون لئی تیار اک بانکا نوجوان -انجھ جویں اوہناں زندگی دی دیہلیز اتے قدم رکھیا ہی ہووے۔ ادوں نہ مور بیماریاں تے بڈھاپے دا مدھولیا لگدا سی تے نہ ماں مرن کنڈھے پجی ہوئی جاپدی سی نہ ہی انجھ نظر آؤندا سی جویں اوہ اک دوسرے نالوں سدا لئی وچھڑن والے ہون۔"

جدوں جینی دی موت ہوئی تاں اوہ اپنے پنج بچیاں وچوں دو نوں دفنا چکی سی اتے بری طرحاں ہمبھ چکی سی۔

جینی دی موت پچھوں مارکس وچ پہلاں والی چنگیاڑی تاں نہیں سی رہی پر اسدی سوچ دی آبوتاب اخیرلے پل تکّ قایم رہی۔ اپنی جیون ساتھن دے تر جان توں بعد 1883 دے مارچ دے اک دن تیجے پہر اوہ چپّ چپیتیاں اس دنیا توں رخصت ہو گیا۔ پر جاندیاں ہویا اوہ منکھتا لئی بہت کجھ سوچن، وچارن تے کرن لئی چھڈّ گیا۔

٭ ٭ ٭�مارکس دے وچاراں دی موت دے اعلان اسدے اکھاں میٹدیاں ہی شروع ہو گئے سن اتے اج تکّ جاری ہن۔ پنجابی پرچے "ہن" وچ چھپے اک لیکھ وچ پنجابی پاٹھکاں تکّ ایہہ خبر پہنچائی گئی ہے کہ بھلے لوکو تسیں کتھے بھلے پھردے ہو، کجھ جگتپرسدھ مارکسوادیاں سمیت بہت سارے نویں فلاسفراں نے بہت چر پہلاں 1977 وچ اکٹھے ہو کے ایہہ اعلان کر دتا سی کہ "مارکس مر چکا ہے۔"

سوویت یونین دے خاتمے توں بعد تاں ایہہ کیہا جان لگا کہ "مارکس دے مرن" دی خبر دی کسے ہور تصدیق دی لوڑ ہن رہِ ہی نہیں گئی۔ پر پھیر وی مارکس دے مرن دی خبر وار وار دہراؤنی ضروری سمجھی جا رہی ہے۔ اسدا کارن سوائے اسدے ہور کی ہو سکدا ہے کہ مارکس دے مرن دیاں خبراں دین والیاں نوں اندروں ایہہ یقین نہیں کہ مارکس مر گیا ہے۔ ایہہ ٹھیک ہے کہ روسی انقلاب مارکس دے وچاراں دی جت دا پرتیک سی اتے سوویت یونین دے خاتمے نے مارکسوادیاں لئی کئی بنیادی سوال کھڑے کر دتے ہن۔ تاں وی روسی انقلاب مارکسی وچاراں دے پربھاو ہیٹھ آئیاں وشو تبدیلیاں دا اکو اک پرگٹاوا نہیں سی بھاویں ایہہ پرتیتیوگ پرگٹاوا ضرور سی۔ ایہناں تبدیلیاں دے کئی ہور وی روپ ہن۔ ایہہ روپ اینے پرتکھ روپ وچ مارکسی سوچ وچ رنگے ہوئے نہ وی ہون پر ایہناں پچھے مارکسی پریرنا دی موجودگی توں انکار نہیں ہو سکدا۔

تاں وی روسی انقلاب دے سنبندھ وچ اک گلّ ضرور آکھی جا سکدی کہ ایہہ انقلاب ستّ دہاکے ٹکیا جدوں پیرس کمیون ستّ دن تے فرانسیسی انقلاب کیول ستّ گھنٹے ٹکیا سی۔

ایہہ مارکس دے وچاراں دا ہی سٹہ ہے کہ راج، سرکار، دھن، سمپتی، محنت، سماجی پربندھ، آرتھک ووستھا تے سداچارک ماپ دنڈ بارے لوک انجھ نہیں سوچدے جویں مارکس توں پہلاں سوچدے سن۔ اوہ آرتھک تے سماجی نابرابریاں نوں نہ صرف کنتو کردے ہن سگوں ایہناں دے خلاف روس تے ایتھوں تکّ کہ ودروہ وی کردے ہن اتے اس ودروہ پچھے حق اتے نیاں دی اس سوجھ وچوں پیدا ہون والی چیتنا وی کم کر رہی ہندی ہے، جہڑی بہت حد تکّ مارکسواد دی دین ہے۔ ہن سادھارن لوک پرستھتیاں نوں بھانا سمجھکے پروان نہیں کردے سگوں ایہناں نوں ونگاردے ہن۔ اوہ حکومتاں، ادھکارت شرینیاں، وشیش ہتاں تے کاروباراں تے سنستھاواں دیاں کاروائیاں لئی اوہناں توں جواب منگدے ہن، بھاویں اوہناں مارکس پڑھیا ہووے جاں نہ۔

ایہہ مارکس دی دین ہے کہ اج دا چیتن منکھ اتہاس اتے نظر نہیں ماردا سگوں اتہاس راہیں نظر ماردا ہے۔ اوہ ایہہ دیکھن دی کوشش کردا ہے کسے اس جاں اس آگوُ، رہبر جاں سربراہ دے بولاں تے کارجاں پچھے کہڑیاں سماجی شکتیاں کنھاں منتواں نال کم کر رہیاں سن جاں کر رہیاں ہن۔ مارکس وچاراں دی مہتتا توں انکار نہیں سی کردا پر اسدا ایہہ متّ پیر پیر اتے صحیح ثابت ہو رہا ہے کہ کسے وی دور دے پروانت وچار اس ویلے دے بھارو ہتاں دی ہی سیوا کردے ہن۔

مارکس نوں وچاراں دے سنسار وچوں باہر رکھن دے یتن - بھاویں ایہہ یتن مارکس دے مرن دیاں خبراں دہراؤن دی شکل وچ کیتے جا رہے ہون جاں اسنوں لائبریریاں، سروجنک بحثاں، نیتی وچار وٹادریاں تے پاپولر میڈیئے توں باہر رکھن دی شکل وچ -اصل لوکاں نوں اج دے یگ دی چیتنا توں محروم کرن دے یتن ہن۔

سروت:نسوت

No comments:

Post a Comment